Sri Lanka sorkarin chhungkaw harsa zualte hnenah ṭanpuina sum pe dawn
Sri Lanka sorkar chuan Thawhlehni khan an ram economy tlahniam avanga harsatna tawk chhungkaw harsa zualte tan ṭanpuina sum Rs 3,000 aṭanga Rs 7,500 thleng an pe dawn tih a puang.
He thutlukna hi Cabinet meeting chuan Thawhṭanni khan a pawm a ni. World Bank chu anmahni chhawmdawl tura hmalatu an ni dawn tih trade minister Shehan Semasinghe chuan a sawi. Chhungkua nuai 33-te hnenah May-July inkarah pawisa hi pek tum a ni, a ti.
"Chhungkaw sum lakluh tlem, low income-te chuan samurdhi (poor relief) hi an dawng thei dawn. Economy lama harsatna thleng mek hi kum upa, kal ṭha lo leh rualban lote chuan an tuar na zual bik hle. Sorkar chuan heng chhungkua chhawmdawlna tur hi rang takin a ngaihtuah a, midang pawh dawng thei tura chhawpchhuah an ni," tiin Semasinghe chuan a sawi.
Thuchhuah tarlan danin, elder allowances, kidney patient allowances leh disability allowance-te chu chhungkua khawsak lama harsatna tawkte tan Rs 3,000-7,500 inkar pekchhuah a ni ang. Bank account kaltlang chauhin pawisa hi thawn an ni dawn a. Ṭanpuina dawng thei mah se bank account nei lote chu sorkar official zinga mawhphurtute'n an hawn tir vat tur a ni, tiin minister chuan twitter-ah a tarlang.
Central Bank Governor (CBSL) Nandalal Weerasinghe chuan kar hmasa khan rampawn aṭanga mamawh leina atan Sri Lanka tan World Bank-in USD mtd 600 ṭanpuina an pek tur thu a sawi. USD mtd 600 aṭang hian USD mtd 300 chu chhungkaw harsate chhawmdawlna turin ruahmanna an siam thu Weerasinghe report chuan a sawi.
Hetih lai hian, prime minister Mahinda Rajapaksa office chuan damdawi, eitur, fuel leh mamawh dang lei nan China chuan Yuan mtd 300 pek an tum thu a puang. Thla hmasaa Rajapaksa leh China premier Li Keqiang-te inbiak hnuah, China chuan ṭanpuina a pek tur thu hi a puang a ni.
Leiba ngah avanga buai mek, Sri Lanka ramah hian March thlaa thil man sanna 18.7% chu April thlaah 30% dawnah a kai chho leh tawh a ni. Kum tam tak chhunga an ramin economy lama an dinhmun chhiat ber lai an tawng mek a ni.