NKorea-in ballistic missile kapchhuak leh : SKorea

North Korea chuan kar hmasa lawka an nuclear ralthuamte a rang thei ang bera thawm ṭhat an tum thu an sawi hnuah, nimin khan khawchhak lama tuipuiah ballistic missile an kapchhuak tih South Korea military chuan a sawi.

Nimina an missile enchhin nen hian North Korea hian kuminah missile 14 a lo enchhin tawh a ni.

SKorea sipai chuan NKorea hian nimin chawhnu lam khan Pyongyang-a Sunan area aṭangin a kapchhuak niin an sawi a, Sunan aṭang hian March 24 khan intercontinental ballistic missile (ICBM) chi thar nia a sawi, Hwasong-17 chu a lo kapchhuak tawh bawk.

Japan Coast Guard-te chuan North Korea aṭanga ballistic missile ni theia an hriat chu an kapchhuak lai an hmuh thu leh leiah a tlak tawh thu an sawi ve bawk a ni. An missile kahchhuah hi eng ang nge tih leh, flight range leh altitude erawh hriatchian a la ni lo.

NKorea-in April 16-a tactical guided weapon thar an kahchhuah aṭanga kar thum hnuah an ram nuclear ralthuam chakna an pholang nawn leh a ni. NKorea hian tunhnai chho aṭang hian an ralthuam enchhinna an nei fo a, kum 2017 March thla hnua a ṭum khatna atan long-range missile enchhinna pawh an chhunzawm leh tawh a ni. SKorea leh US-a official-te chuan nuclear test tam zawk nei turin inbuatsaihna an kalpui mek tih an sawi.

Kar hmasa khan North Korea hotu Kim Jong Un chuan an rama nuclear ralthuam neih mek chu thawmṭhat hna chak zawka kalpui a lo tiam tawh a, hetihlai hian United States nena nuclear ralthuam tibo tura an inbiakna chu an la chawlhsan a ni.