Indona chhuah chhanah Putin ang bawkin Zelenskyy hian mawh a phur : Luiz Inacio Lula

Brazil president hlui Luiz Inacio Lula da Silva chuan Ukraine-a indona chhuah chhanah Russia president Vladimir Putin ang bawkin Ukraine president Volodymyr Zelenskyy chuan mawhphurhna sang tak a nei a ni, a ti.

Lula chuan Russia-in Ukraine a run chu thil tihloh tawp tur a nih thu a sawi a, hemi rual hian US president Joe Biden chu indona pumpelh thei zawnga hma la ṭha tawk lo leh buaina tipunluntuah a puh zui bawk a ni.

Time magazine chuan Lula an kawmna hi Nilaini khan a tichhuak a, tun kar Time cover-ah Lula thalak hi dah a ni bawk.

Lula hian October thlaa an ram President thlanna neih turah far-right president Jair Bolsonaro chu paihthla a, President nih leh ngei hi a tum a ni. Eiruk thubuai avanga thiam loh chantira tanina khung a nih hnuah, a hremna hi nikum khan tihtawp sak niin, Lula pawh hian politics a khelh chhunzawm leh thei a ni.

Brazil President hlui hian khawthlang ram hruaitute chu Zelenskyy fuihpawrhtuah a puh a, indona titawp zawnga inbiakna neih aiin tipunlun zawngin an khawsa a ni, a ti. "Television-a Ukraine President thusawi lai ka hmu a, European parliamentarian-te chuan ding chunga kut bengin amah an lawm a ni," tiin Time-in a kawmnaah hian a sawi. "Putin ang bawkin Zelenskyy hi mawhpuh theih a ni. A chhan chu indona thleng hi mi pakhat chauh thiam loh a ni thei lo a ni," a ti.

Biden leh European Union hruaitute chuan Ukraine indona thlen hma khan inbiakna an neih tam tawk loh thu Lula chuan a sawi a, "United States hian politics lamah thil tihtheihna sang tak an nei a, Biden chuan indo hi a pumpelh tir thei a, mahse a tipunlun zawk a ni," a ti. "Biden hi Putin hmu turin Moscow-ah pawh kal tur a ni. Hei hi hruaitute rilru putzia diktak tur chu a ni," tiin a sawi.

United States leh European Union-te chuan Ukraine-in NATO an zawm thei lo ang ti se chuan indona hi a thleng lo ang, a ti a. "Putin chuan Ukraine chu a run tur a ni lo. Mahse Putin chauh hi mawhphurtu a ni lo a ni. US leh EU-te pawhin thil an tidik bik lo," tiin Lula chuan a sawi a ni.