Taliban-in hmeichhiate tan Driving Licence pek chhuah titawp

Afghanistan-a rorel­lai Taliban sorkar chuan Kabul leh province ṭhenkhatah hmeichhiate tana Driving licence an pek chhuah ṭhin chu an titawp tih media report chuan a sawi.

Taliban-in thu­neihna an chan hma chuan Afghanistan khawpui ṭhenkhata hmeichhiate'n motor an khalh lai hmuh tur an awm fo a,mahse Taliban-te chuan hmeichhiate tana driving license pek chhuah hi an titawp ta a ni.

Nikum August thlaah Afghan sorkar paihthlaa Taliban-in rorelna an chan hnu atang khan Afghanistan ram dinhmun hi a tlahniam chak hle a ni. Ramchhunga inbeihna chu tawp tawh mah se mimal dikna bawhchhiatna erawh ala thleng chhunzawm zel a, a bikin hmeichhiate chungah a hluar zual hle.

Tun hnaia dan thar tihchhuahah, Taliban thuneitute chuan zirlai hmeichhia, Class 6 chunglamte chu school kal an phalsak lo a, khawvel ramdangte dem rawn pawh an hlawh phah hle a ni. Taliban lam erawh chuan school-a zirtirtu indaih loh avanga ruahmanna siam an nih thu leh hmeichhe zirlaite hian an zirna an chhunzawm vat thei dawn tih an sawi.

Afghanistan hian nitin khawsak kawngah harsatna namen lo an hmachhawn mek. Afghanistan hi khawvel ram zinga ei leh in lama harsatna tawk mipui tamna ber niin, mi maktaduai 23 chuangte chu chhawmdawl ngaiin an awm mek. Afghan mipui zinga 95% te chuan ei tur khamkhawp an hmu zo lo a ni.