President Biden-a'n New Mexico-ah 'disaster' puan a remti

US president Joe Biden chuan Nilaini khan New Mexico-a ram kang nasa tak thleng mek chu 'major disaster'-ah puan a remti. Disaster-a puan a nih tak avangin April thla tir lam aṭanga ram kang tuar tawh, New Mexico ṭanpuina tur hi sorkar laipui lamin a pechhuak thei dawn a ni.

Ram kang hi kum dang aiin a darh zau a, scientist-te chuan climate change vangin a kangkai chak niin an sawi.

New Mexico-a ram kang thleng chu disaster-a puan a nih tak avangin New Mexico hmarlam, Mora leh San Miguel county-te tan sorkarin chhawmdawlna sum a pe thei dawn a ni. Heng kangmei chhuak hian chenna in leh bungraw tam tak a kang chhe tawh a, Las Vegas khawpui tan pawh a hlauhthawnawm pha nia sawi a ni.

Disaster declaration tihchhuah a nih tak avangin April thlaa ram kang vanga mi pahnih thihna thlenna, Lincoln County ṭanpuina pawh pek a ni dawn a, Ruidoso resort town-ah pawh in 200 chuang a kang tel bawk. April thla tir lama ram kang tuartu, Colfax leh Valencia county-te pawhin chhawmdawlna hi an dawng bawk ang.

Sorkarin chhawmdawlna a pek tur hian in kang tuarte tana awmna lailawk tur siamna leh an in siamṭhatna tur te, an bungrua insured loh tana a pung tlemte loan pekna tur te, tualchhung mi leh sumdawngte kangmeiin an thil a kanchhiat takte tana ṭanpuina tur programme siamte a huam a ni.

Kangṭhelhtute chuan ram kang hi an ṭhelh chhunzawm reng a, thli tleh a ziaawm tak vangin kangmeiin hmun dang a kangkai zel tur pawh an dang thei rih a ni.