Cuba tana special policy titawp
US President Barack Obama chuan Ningani khan Cuba mite tana special immigration policy an siam chu a titawp. He policy, ‘Wet foot, dry foot’ tia an sawi hnuaiah hian Cuba mite chu visa nei kher loin khawmual aṭanga US an luh phalsak an ni a, mahse tuipui lam aṭanga luh ruk tumte erawh chu thawn kir zel an ni thung.
US-in Cuba mite special immigration policy a siam hi siamṭhat tumin ram pahnih aiawhte hi thla eng emaw zat an inbe tawh a ni. Cuba thuneitute chuan tuipui lam aṭanga US luh tum lo hnarte chu US-a an kir leh phalsak vek an phut.
Department of Homeland Security chuan Cuban medical professional-te luh phalna parole program pawh a titawp bawk.He program hnuaiah hian Cuba rama doctor tam takin US lam an phah avangin Cuba chuan program tihtawp hi a duh a ni.
US Coast Guard-te chuan kumtinin tuipui km 145 zeta thui kaltlanga Cuba mi, an rama luh tumte chu Florida-ah mi sang tel an man ziah a, khawmual lamah Mexico kaltlanga luh tum tam tham tak man an ni ziah bawk. Heng mite hi a tam zawk chu US-a an awm zui phalsak an ni a, hetihlai hian ram dang aṭanga dan loa US luh tum mante chu an ram lamah thawn haw an ni ṭhin.
Cuba chuan US-in immigration policy a thlak danglam chu lawmawm a tih thu sawiin, America luh tum vanga zinkawng hautak leh hlauhawm tak tak zawh ṭhin leh, mihring hmanga sumdawnna kalpui ṭhin pawh a tihziaawm phah ngei an beisei thu an sawi. El Savador foreign ministry pawhin policy thlak danglam a ni chu lawmawm a tih thu a sawi a, pem luh tum zingah category hrang hrang a awm thei lo a ni, a ti.