Raltlan thawn kir chungchangah Myanmar leh Bangladesh inbe dawn

Myanmar leh Bangladesh sorkar chuan Myanmar Rakhine state aṭanga Bangladesh rama Rohingya muslim raltlante lakkir an nih dan turah inbiakna neih an remti.

Nikum October 9 khan Bangladesh ramri-a border post apthum beih a ni a, he thil thleng vang hian Myanmar security force-te chuan Rakhine state-ah hian beihpui an thlak zui a ni. Sipaite beihpui thlakna avang hian Rohingya muslim tam tak chu Bangladesh ramah an tlanchhia a ni.

Myanmar Minister of State of State for Foreign Affairs U Kyaw Tin chuan Bangladesh ram tlawhin, Bangladesh Prime Minister Sheikh Hasna leh Foreign Minister Abul Hassan Mahmood Ali te a hmu a, ram pahnihte thawhdunna turte an sawipui bakah, tunhnaia Bangladesh rama raltlan luh chungchangte hi an sawiho a, Myanmar rama hruaikir an nih leh theihna tura inbiakna neih an remti a ni.

Border post beih a nih avanga sipaiten civil mite an bei zui nia sawi chungchang chhui tur hian Myanmar sorkar member 13 awmna investigation commission a din a, Vice President U Myint Swe-an a ho a ni. Commisson chuan January 4 khan report hmasa a tichhuak a, hetah hian Mauangtaw biala sipaite beitu leh pawikhawihna thlentute chu Rohingya pawl, Rohingya Solidarity Organization (RSO) nena inzawmna nei, Havid Tuhar-a kaihhruai Aqa Mul Mujahidin te tih niin a tarlang. Civil mite chunga sipaite rawng taka che a, pawngsual, nghaisak leh in halsak te a awm nia sawi chu a finfiahna awm lo niin a tarlang bawk a, hei hi human rights pawl hrang hrangte chuan an pawm lo.