Covid-19 kaihhnawih vangin mi mtd 15 dawn thi tawh : WHO

World Health Organization (WHO) chuan Ningani khan khawvel pumah kum 2021 kumtawp thleng khan Covid-19 hri kaihhnawih vanga thi zat chu mi maktaduai 15 dawn an tlin tawh thu a sawi.

WHO chhut danin, January 1-December 31,2021 inkara Covid-19 vanga thi zat chu mi mtd 14.9 an ni. Covid-19 hrileng vang ngawr ngawra thi bakah, natna benvawn neisa te'n hripui leng vanga health system indaihlohna lian tak an tawh laia enkawlna leh invenna ṭha an neih loh avanga thi pawh an tam hle.

Mitthi zinga 84%-te chu South-East Asia, Europe leh America mite niin, mitthi zinga 68% chu ram 10-a mi an ni tih WHO chuan a tarlang bawk. Hri vanga thi zat mtd 14.9 aṭanga 81% chu middle-income ram mite an ni a, high-income ramah thi zat hi 15% niin low-income ramte chuan 4% an nei thung.

Covid-19 hri vanga thi zinga 57% chu mipa niin, 43%-te chu hmeichhia an ni. "Heng data-te hian hri leng nghawng kan tawrh nat zia chauh tarlang loin, heng harsatnate a rawn thlen thulhah ram zawng zawngin health system ṭha an mamawh zia a tarlang chiang hle a, health information system changtlung tak pawh kan mamawh a ni," tiin WHO director general Tedros Adhanom Ghebreyesus chuan a sawi.

Omicron subvariant lakah vaccine te'n min venghim ṭha : WHO chief
South Africa rama Covid-19 darh leh mek, omicron sub-variant lakah vaccine-te chuan min venghim ṭha tawk tih WHO hotu chuan a sawi.

"Heng sub-variant tharte hian omicron sub-variant dangte aiin natna khirh zawk a thlen thei dawn em tih hrechiang tur chuan a la hma lutuk a ni. Mahse, data hmasate chuan vaccine kan lak hian natna khirh tak leh thihna lakah min venghim ṭha tawk tih a lantir," tiin Tedros chuan Geneva-a media briefing an neih ṭumin a sawi.

Omicron sub-variant pahnih BA.4 leh BA.5 chu South Africa-ah chak takin a darh leh mek a ni.

Tedros chuan khawvel ram leh health system-te chu hri inthlakdanglam, mutation a awm lohnan test leh hnuchhui nei uar chhunzawm turin a chah. "Ram tam zawk chuan hri inthlak danglam dan hi an hmuthiam pha lo. Engnge kan hmalamah hian lo thleng tur kan hre lawk lo a ni," a ti.