Brazil jail-a intihbuainaah mi 10 an thi

Brazil ram hmarchhak lam, Rio Grande do Norte state-a Alcacuz jail chhunga intihbuaina thlengah mi tang 10 an thi a, thi zinga ṭhenkhat chu lu tansak an ni.

Police-te chua jail-a tang pawl, misual pawl pahnih inkarah buaina hi a chhuak niin an sawi a, Inrinni tlai kha jail chhunga pawl chak ber nia sawi member-te chuan an hmelma pawl member-te chu an bei a ni. Hei hi kumin chhunga Brazil-a jail chhunga buaina lian tham a chhuah ṭum thumna a ni a, thla lir lam khan Amzonas leh Roraima state jail-a buaina chhuak vangin tang 100 dawn an lo thi tawh bawk a ni.

Alcacuz jail chhunga buaina chhuakah hian silai puak ri te pawh hriat a ni a, police-te pawh jail chhungah hi an lut mai ngam lo a, nimin zing khan an lut chauh nia sawi a ni. Mahse buaina chhuah hnu hian tang zingah jail aṭanga tlanchhuak an awm lo niin, Rio Grande do Norte state prison system hotu Major Wellington Camilo chuan a sawi.

Brazil rama jail-te hi a tawt hlawm hle a, jail chhungah hian gang thiltithei tak tak an inluling thei hle. Amazonas jail chhunga buaina a chhuah hnu hian sokrar chuan high security jail panga siam belh a nih tur thu a puang a, jail chhunga gang inluling ṭhinte danna turin intelligence unit thar din a nih tur thu pawh a puang a ni.