Iraq sipaiten IS kut aṭangin university la let

Iraq sipaite chuan Islamic State (IS) firfiak pawl kut aṭanga an ram khawpui pawimawh, Mosul khua lak let tuma beihpui an thlak mekah hma an sawn zel a, IS kut aṭang hian Mosul university pawh a la let tawh niin state TV chuan a tarlang.

Nikum October thla aṭang khan sipaite hian Mosul lak let tum hian beihpui an thlak ṭan a ni. Official-te chuan kum 2014-a IS-te’n Mosul an awp aṭang khan university-a laboratory-te chu chemical ralthuam siam­na atan an hmang ṭhin niin an sawi a, hei vang hian firfiakte kut aṭanga university complex pum an la let thei chu thil lawmawm leh hnehna ropui tak a ni, an ti. Sipai official-te chuan Mosul khaw chhak zahve zet chu sipaite kutah a awm tawh a, Tigris luia lei pawimawh panga zinga pathum pawh an thununna hnuaiah a awm tawh niin an sawi bawk.