Tumahin min dang thei lo : Duterte

Philippines President Rodrigo Duterte chuan an rama ruihhlo vanga buaina an tawhte chuan zuallam a pan zel a nih chuan, sipai hnena thuneihna sang pekna, martial law a la puang maithei tih a sawi. Martial law puanna kawnga a duhthlanna siam chu tumahin an dang thei lo tih a sawi nghal bawk.

Davao khuaa sumdawngte intawhkhawmnaa thu a sawiah, Duterte chuan, “Filipino mipuite hi ka venhim an ngai a, hei hi ka tih tur a ni. Martial law hi puan a ṭul nia ka hriat chuan ka puang mai ang”, a ti.

Supreme Court thuneihna lam pawh a ngai pawimawh lo tih sawiin, tumahin a duhthlanna siam kawngah an dang thei lo tih Duterte chuan a sawi.

Philippines rama 1987 Constitution hnuaiah, president hian an ramin beih a tawk emaw, helna nasa tak a chhuak emaw a nih chuan ni 60 chhung atan martial law hi a puang thei a ni. Mahse ram danpuiah hian ruihhlo chungchang hi tarlan tel a ni lo a, president hian ruihhlo buaina avanga martial law hi a puang a nih chuan, Congress leh Supreme Court chuan a thupek ennawn tur hian thuneihna an nei a ni.