Obamacare thlakna tur peihfel thuai dawn

US President-elect Donald Trump chuan president kalchhuak tur, Barak Obama signature health insurance law, Obamacare tia sawi chu thlak a tum thu a sawi nawn leh a, a thlakna tur ruahmanna an siam pawh peihfel a ni thuai dawn niin a sawi.

Donald Trump chuan healtcare law siam thar chu Republican rorelna, Congress-ah tlangzarh a ni dawn tih sawiin, ruahmanna thar an siam chu a hma aiin a hautak lo zawk dawn tih a sawi bawk.

Trump chuan, “Mi zawng zawng tan insurance siam a ni vek dawn a ni. A hma khan ṭhenkhat chuan sum sen tur kan pe thei lo a nih chuan insurance hi kan dawng thei lo a, mahse kan hunah chuan hei hi a thleng lo ang” a ti. Trump chuan damdawi man tihsan chungchangah damdawi siamtu company-te pawh bitum an la ni dawn tih a sawi a, kum upa leh mi rethei zawkte pualin Medicare leh Medicaid goverment health plan nena inbe tura an nawr thu a sawi.

President thlan dawna campaign-naah Republican lam chuan Obamacare hi tihtawp an lo tiam tawh a, Trump pawhin he program hi a ṭhat loh thu a sawilang fo a ni. He dan hnuaiah hian mi maktaduai 20 vel an inziaklut a, mahse insurance premium pek ngai zat chu tihsan a ni a, mi tam takin he system hi an chhuahsan phah a ni. Mahse Democrats lam chuan Obamacare hian American mi tam zawk tan medical insurance a siamsak a, healthcare tana sum senral pung chak zel pawh a tihnep phah niin an sawi thung.