Police-ten Instanbul nightclub beitu man

Turkey Police-te chuan Thawhṭanni khan January 1-a Istanbul-a nightclub-a kumthar lawmtute bei a, mi 39 thattu nia hriat chu an man.

Police-te hian hun rei tak pawikhawihtu hi an zawn hnuah, Istanbul-a Esenyurt district-ah a chenna-ah a fapa, kum li mi nena an awm lai an nang fuh a ni.

Reina nightclub beih a nih hnu hian pawikhawihtu tlanbo tur dan nan khawpui chhungah venhimna khauh taka kalpui a ni a, ramri-ah pawh ngawrh taka duty a ni. Islamic State (IS) fir­fiak pawl chuan he pawikhawihna thleng hi an tih niin a chhal. Nikum June thlaa Istanbul airport-a ṭum thum thihchilh bomb tipuaktute pawh IS mi leh sate nia puh an lo ni tawh bawk. IS chuan Turkey sipaiten Syria rama an pawl laka beihpui an thlak avanga phuba lakan atan he pawikhawihna hi an thlen niin a sawi.

Nightclub beitu hi Uzbekis­tan mi, Abdulkadir Mashsripov niin media lam chuan an sawi a, sorkar hnuaia Andolu Agency chuan Abdulgadir Mashripov tiin a sawi thung. Thu zawhfiah tura police headquarters-a hruai a nih hmain medical check neih­tir phawt a ni. A ṭhian pakhat nia sawi leh, midang pathum pawh hren an ni a, a fapa hi protective custody-ah dah a ni.

Turkey Foreign Minister Mevlut Cavusoglu chuan a Twitter-ah interior minister Suleyman Soylu, police leh intelligence organisation-te chu Reina beitu man anih tak avang hian lawm­thu a hrilh. Hemi hma hian Deputy Prime Minister Numan Kurtulmus chuan nightclub beitu hi intelligence organisation puih­na hi zawn a nih thu a sawi a, mahse eng pawl nge chhawr tih erawh a sawilang lo.

January 1 khan Reina nighclub-ah hian kumthar lawmin mi tam tak an pungkhawm a, hetihlai hian silai keng mi pakhat chuan club pawn lama awm, police officer leh civil mi pakhat a kahhlum hnuin, a chhungah lutin a silai hi a pawng kah zui a ni. Thi zinga a tam zawk hi ramdang mi an ni a, silai a hmehpuah hnu hian pawikhawihtu hian taxi in Reina hi a chhuahsan zui a ni.