Gambia President fapa uiin a sehhlum

Gambia President-elect, Adama Brrow-a fapa, kum riat mi Habibu Barrow chu uiin a seh vangin a thi.

Habibu Barrow hi Pathianni khan uiin a seh vangin Gambia khawpui, Banjul bula Manjai hospital panpui a ni a, mahse kawng lakah a thi hman a ni. Hetihlai hian Senegal rama awm mek, a pa Barrow chu a himna ngaihtuah a ngaih avangin a fapa vuinaah pawh a tel thei lo.

Nikuma Gambia President thlanna neihah khan Barrow hi thlan tlin a ni a, mahse president kalchhuak tur Yahya Jammeh chuan inthlan result hi a pawm lo tih a sawi. Naktuk hi President thar lakluh hun atana ruahman a ni a, hemi hma chu Senagal ramah hian awm rih turin Barrow hi regional body, Ecowas chuan a ngen. Jammeh hian thuneihna a hlan duh dawn lo a nih chuan sipai pawh inrawlhtir mai a ngai dawn niin a sawi.

Jammeh hian Supreme Court-ah President atana Barrow lakluh tur hi dang turin a ngen a, mahse Thawhṭanni khan Chief Justice chuan a ngenna hi a hnawlsak a ni.