Taliban-in hmeichhiate an hmai khuh vek turin thu pe

Afghanistan-a Taliban sorkar chuan hmeichhiate chu pawn chhuahnaah an hmai khuh vek turin a ti a, hei hi ram hrang hrang leh Afghan mi tam tak pawhin an sawisel nghal a ni.

Taliban sorkara Ministry for the Propagation of Virtue and the Prevention of Vice chuan Taliban hotu lu ber, supreme leader Hibatullah Akhundzada thupek hi Kabul-a press conference-ah an tichhuak a ni. Supreme leader thupek angin, hmeichhiate chuan pawn chhuahnaah an hmai an khuh vek tur a ni a, khuh lo an awm a nih chuan sorkar lam aiawhte chuan hmeichhia pa emaw, a chhungkhat hnai mipa tu emaw ber chu tlawhin, mipate hi tantir emaw, an hna aṭanga ban emaw theih an ni dawn tih a tarlang.

Hmeichhiate hmai khuhna atan hian burqa pawl hman tur an ti bawk a, hei hi kum 1996-2001 chhunga Taliban-ten sorkarna an siam laia an symbol anga an hman a ni.

Aghanistan-ah hian pawn chhuahnaah hmeichhia tam berte chuan an lu an khuh ṭhin a, mahse khawpui hmun tam zawk, a bikin Kabul leh urban area-ahte chuan an hmai hi an khuh tel ngai lo.

Nikum August thlaa Afghanistan-a civil sorkar paihthla a, thuneihna an chan hnuah Taliban-te hian sorkarna an lo siam hmasak tawha hmeichhiate an rahbehna ang kha a thlen leh hlauhthawnna a lian nghal hle. Mahse thuneihna an chan tirh khan Taliban-te chuan kalphung thlakin, sorkar huamzau zawk an siam dawn a, hmeichhiate dikna chanvo pawh humhalh sak an ni dawn tihte an lo sawi fo a ni. Mahse hetianga an sawi chung hian hmeichhiate dinhmun erawh a chep chho zel tho a, high school zirlai hmeichhiate chu school kal chhunzawm an phalsak loh bakah, tun hnaiah hmeichhiate chu mipate tel loa an zinchhuah a khap a, mipa leh hmeichhiate pawh a ruala park-a an kal khapna te pawh a siam leh tawh a ni.