Russia-in Ukraine-a school pakhat a bomb

Russia leh Ukraine inkara buaina kal zelah Russia chuan nimin khan Ukraine khaw pakhat Bilohorivka-a school a bomb a, mi pahnih an thi tih a chian tawh bakah mi eng emaw zat building tlu karah an tang.

Luhansk region governor, Serhiy Haidai chuan mi pahnih an thih tawh thu hi sawiin mi 60 vel chu building chhe karah an tang a, mitthi dang an awm belh a hlauhthawnawm thu a sawi. Russia-in school an bomb hi mi 90 velin tawmhimna atan an hmang a, nimina bomb a nih hnu hian mi 30 vel chu chhanhim hmanin chung zinga pasarih chu an hliam.

Haidai chuan thlawhtheihna hmangin Russia chuan bomb an thlak tih a sawi a ni. Helai hmun hi Inrinnia Russia leh Ukraine nasa taka an indona hmun Severodonetsk bulhnaia awm a ni a, Ukraine chanchinbu pakhat Ukrayinska Pravda chuan kar hmasa lamah phei kha chuan an indona hmun ber pakhat niin a tarlang.

Russia bomb hian building a tihtluk bakah kangmei nasa tak a tichhuak niin an sawi a, kangmei ṭhelh tur pawh hian kangṭhelhtute chuan darkar thum lai an bei niin an sawi. Governor chuan building chhia thenfai a nih hnuah thi zat tak tak chu hriat a ni chauh ang, tiin a sawi bawk.