Nigeria sipaiten refugee camp an bomb

Nigeria sipaite chuan tihpalh thilin an ram hmarchhak lama refugee camp an bomb a, mi 52 an thi a, mi dang tam takin hliam an tuar.

Rann-a refugee camp bomb-naa thi zingah hian raltlante chhawmdawl hna thawktute pawh an tel a, Red Cross hnuaia thawk mi paruk an thi tel a ni.

Chhawmdawl hna thawktu, MSF agency chuan mi 200 chuangin hliam an tuar tih sawiin, hliam tuarte enkawlna kawnga puih an ngaih thu a sawi.

Nigeria President Muhammadu Buhari chuan he thil thleng hi an tihsual a nih thu leh pawi a tih thu a sawi a, mipuite chu inbengdai turin a ngen. Nigeria sipaite hi an ram hmarchhak lam, Cameroon ramri bulah Boko Haram helte nen an inbei reng a, tun ṭum hi sipaiten thil an tihsual an pawm thu an sawilan vawikhatna a ni.

Red Cross thupuangtu Aleksandra Matijeivic chuan staff-te bakah, Thawhlehni-a raltlante ei tur sem tura group volunteer 10 chuang thlengte chu hliam tuar zingah an tel niin a sawi. Red Cross chuan harsatna tawk mekte chhawmdawl hna chu a thawh chhunzawm zel tur thu a sawi nghal bawk.

MSF chuan Rann camp beih a nih la hian an pawl hnuaia medical team chu hnathawkin an awm mek niin a sawi a, camp hi ṭum hnih an bomb niin MSF emergency response hotu Hugues Robert chuan a sawi. Refugee camp beihnaa thi zinga a tam ber hi Boko Haram firfiakte hlaua tlanchhia, camp-a khawsa te an ni.

Nigeria sipai thupuangtu, Gen Rabe Abubakar chuan Rann camp pawn lamah hian Boko Haram ho sulhnu hmuh a nih avangin, sipaite chu an che zui ta niin a sawi. An tihsual an pawm thu sawiin, pawi an titakzet tih a sawi. Counter-insurgency operation commander, Gen Lucky Irabor chuan thil thlen dan chu chhui chian a ni tur thu a sawi bawk.

Boko Haram hian Nigeria sorkar paihthla a, Islam ram din tumin an hel a, tunhnaiah sipaite nen hian an inbei ngawrh zual hle. United Nations chuan Nigeria hmarchhak biala mi tam tak chuan tualchhung indona thleng vangin ei tur an tlachham mai dawn nia sawiin, ṭanpui nan dollar tluklehdingawn khat mamawh a nih thu a sawi. Mi 100,000 vel chu rilṭama thih mai hlauhawmin an awm tawh a, heng zinga a tam zawk chu naupang an nih thu a sawi.