Ivory Coast prime minister a thi
Ivory Coast prime minister nilai Amadou Gon Coulibaly chu Nilaini khan kum 61 mi niin lung lam ṭha lo avangin a thi. Amadou Gon Coulibaly hian a lung lam ṭhat loh avangin kum 2012 khan zai a lo tawk tawh a, kumin May 2 khan France khawpui Paris-ah thla hnih chhung treatment a lak hnuah July 2 khan an ramah a haw leh a, July 8-a cabinet meeting an neih laiin a dam lohna hi a zual thut a, damdawi-in panpui a nih hnuah a thi zui ta a ni.
President Alassane Ouattara chuan PM thi ta chu a ui thu sawiin, an ramin sunna hun a hman dawn thu a sawi. "Kum 30 meuh ka lo thawhpui tawh Coulibaly hi ka ui tak zet a, July 2-a kan rama a lo haw khan airport-ah ram siamṭhat hna thawk leh thei tura a lo haw thu a sawi a ni. Kan ram hian amah hi a hre reng tawh ang," tiin Ouattara chuan PM uina thu a sawi. Coulibaly hi kum 2017 January 10 aṭanga a thih ni thleng khan Ivory Coast prime minister nihna a chelh a, kumin October 31-ah presidential thlanna neih tura pawh rorellai party candidate tura tih niin, chak tura rinkai zingah pawh a tel.