Russia Victory Day : Putin-a'n an thlahtute ram venhim zel a tiam

Russia chuan kum 1945-a indopui pahnihna hunlaia Nazi lakah hnehna an chan champha 'Victory Day' lawmna hun chu nimin khan a hmang.

Victory parade-ah Russia president Vladimir Putin chuan thu sawiin "Ukraine-a Russia sipaite chetna chu min dotute hnawhbo leh, khawthlang lam policy-te do letna tura hmalakna a ni," tiin Russia chuan Ukraine-ah hian vauna hrang hrang a tawh thu leh, Russia sipaite chuan Ukraine-a an thlahtute ram chu an venghim a, venhim zel pawh an tum tih a sawi. Ukraine-a sipai chakna hmanga hma an lak mek chu a hun tak a nih thu leh, anmahni tihchhiat tuma dodaltute hnawhbona hun pawimawh a ni, a ti.

Putin chuan an ram himna turin Russia sipaite chuan Ukraine-ah an bei mek a ni, a ti. An inbeihnaa Russia sipaite sunna leh chawimawina atan minute khat chhung ngawi rengin an ding bawk.

Russia rama Victory Day lawm lai mekah hian, an sipaite chuan Ukraine-ah hma sawn tumin theihtawp an chhuah zel a, chhim lama lawngchawlh hmun pawimawh, Mariupol chu lak tumin an bei mek a ni. Indo ṭan aṭanga kar 11 hnuah Russia sipaite hian hnehna chan ngei tumin ṭan an la a, steel mill-ah lak tuma beiin, hetah hian Ukraine fighter 2,000 vel chuan Mariupol chhan tum an la bei let ve a ni. Steel mill hi Russia-in he khawpui chhunga a la la lak loh awmchhun nia sawi a ni a, hei hi a lak hun chuan Mariupol-a thuneihna pumhlum chu a nei thei dawn a, kum 2014-a a lo lak tawh, Ukraine khawchhak lama Crimean Peninsula lamah luhka pawimawh tak an sial thei tawh dawn a ni.