US First Lady Jill Biden-i'n puangzar lawk loin Ukraine a tlawh

US president Joe Biden nupui, first lady Jill Biden chuan Pathianni khan puangzar lawk loin Ukraine a tlawh. Russia beihna karah Ukraine mipuite chu an thlawpzia lantirin chenna lailawk atan an siam school-te tlawhin, Ukraine first lady Olena Zelenska nen an inkawm nghal bawk.

"Ukraine mipuite hnenah he indona hi tihtawp a pawimawh zia tarlan a ṭha in ka hria a, he indona hi a rapthlak takzet a, United States mipuite chu Ukraine mipuite tan kan ding reng a ni," tiin Biden chuan a sawi.

Jill Biden hian Slovakia aṭangin Ukraine hi a kal a, Zekenska chu pangpar a pe. Zelenska hi February 24-a Russia-in Ukraine an run hnua mipui hmaa a inlan lehna hmasa ber a ni.

Zalenska chuan Jill hian an ram tlawh turin thutlukna huaisen tak a siam thu sawiin, "Indona thlen laia heta lo kal tur hian paltlang tur tam tak a awm tih kan hriatthiam pui a, vawiin thleng pawhin ni tin siren ri kan hre reng a ni," a ti. "Min thlawpna hi kan ngaihlu a, US President kaihhruaina hian thlamuanna min pe a ni, Mother's Day hi kan tana ni chhinchhiah tlak tak a nih avangin he ni pawimawh taka in mi thlawpna leh hmangaihna hi kan ngaihlu hle a ni," a ti.

US president Joe Biden chu Russia lakah economy lama hrekna tichhuaktu lian ber a ni bakah, President Vladimir Putin chu indo titawp turin a nawr reng bawk. US President hi indona a thlen hnuah Ukraine-ah a la kal lo a, mahse US top official- secretary of state Antony Blinken, defense secretary Lloyd Austin, leh House Speaker Nancy Pelosi chuan kar hnih liamta khan Kyiv hi an lo tlawh tawh a ni. Jill Biden chuan ramri lam a tlawh zawh hnuah Slovakia-ah hian a kir leh a ni.