Gambia aṭangin mi tam tak tlanchhia

Gambia President kal­chhuak tur Yahya Jammeh-a’n President thar atana thlan, Adama Barrow-a hnena thuneihna hlan duh lo a, state of emergency a puan avangin, tualchhung buaina a thlen hlau mi tam tak chu an ram ṭhenawm, Senegal ramah an tlanchhia.

Nikum December 1-a Gambia President thlannaah khan Jammeh hian eptu pawl candidate, Adama Barrow a hneh zo lo a ni. Mahse Jammeh hian inthlan result hi a pawm lo tih a sawi a, a ban duh loh avang hian West Africa ram dangte pawhin sipai inrawlh tirah an lo vau tawh a ni.

President kalchhuak tur term hi nimin khan tawpin President thar hi lakluh tur a ni. Mahse emergency a puan tak avangin Senegal rama awm mek, Barrow chu an ramah a kir thei lo a, mahse President thar lakluh hi Senegal-a Gambia embassy-ah buatsaih a ni dawn tho tih tarlan a ni.

Barrow-a special adviser, Mai Ahmad Fatty chuan Gambia mipuite chu pawnchhuak tam lo turin a ngen a, Nilaini tlai aṭang khan kawtthlerah mi hmuh tur an tlem tawh hle. Dawr leh sumdawnna hmunte pawh an inkhar a, police leh military force-te chu khawpui chhung hmun pawimawhahte duty tir an ni.

UN refugee agency, UNHCR chuan emergency puan a nih hnuah mi 26,000 vel chu Senegal ramah an tlanchhe tawh niin a sawi.