IS-in an ram lak tam tak hloh tawh

Islamic State (IS) firfiak pawl chuan Syria leh Iraq-a ram an lak tawh zinga hmun li-a ṭhena hmun khat vel chu kum 2016 chhungin an hloh.

Security and defence analyst IHS Markit-i’n a tarlan danin, IS hian an ram lak tawh square km 18,000 zeta zau chu an chan tawh a, tuna an thuneihna chu square km 60,400 bial chauh a ni tawh a ni, a ti. IHS chuan Mosul khawpui laklet tuma beihpui thlak mek, Iraq sipaite chuan kumin kum laihawl velah firfiakte kut aṭanga an lak fel rin a nih thu a tarlang bawk.

IHS Conflict Monitor hotu Columb Strack chuan, “IS hian kum 2016 chhung khan an ram luah zau tak an hloh a, heng zingah hian sorkar hmun pawimawh tak takte a tel a ni” a ti. Hetihlai hian nikum December thla khan IS hian Syria ram khawpui pawimawh tak, Palmyra chu security force-te kut aṭangin an laklet sak niin a sawi.

Iraq sorkarin an ram khawpui pawimawh, Mosul laklet tuma beihpui a thlak mek chu kumin kum laihawl velah a hlawhtlin beisei a nih thu sawiin, Strack chuan he khawpui laklet a nih hnu hian firfiakten Baghdad beihna atana hmunpui bera an hman, Hawija leh a chhehvel lakkir leh tumin sipaite hian an beih zui a rin thu a sawi bawk.