SKorea court-in Samsung hotu man ngenna hnawl

South Korea court chuan prosecutor-te’n Samsung hotu, Lee Jae-yong manna tur thupek tichhuak tura an ngenna a hnawlsak.

Lee Jae-hong hi thamna sum pe, sum ti­chingpen leh dawt hmanga chhechhamah puh a ni. Mahse an puhna hi thu dik lo niin Samsung chuan a sawi thung.

Samsung hian a hnuaia company pahnih chhunfin a nih theihna tura sorkar remtihna a neih theih nan President Park Geun-hye-i ṭhian ṭha tak, Choi Soon-sil-i foundation hnenah thamna, dollar maktaduai 36.3 a pe nia puh a ni. Samsung chuan pawisa hi a pe ngei a, mahse beisei let a nei lo niin a sawi thung.

Kum 48 mi, Lee Jae-yong hi Samsung dintu Lee Byung-chul-a tupa leh company chairman nilai Lee Kun-hee-a fapa a ni a, Samsung Electronics-a vice chairman nilai a ni. Nikum khan Samsung Electronics board-a tel tura rawt niin, October 27-ah dah a ni. A pa, Lee Kun-hee hi kum 74-a upa a ni tawh a, a pa a chawlh hunah thlaktu tura beisei a ni bawk. Hetihlai hian sawiseltu lam chuan Lee Jae-yong hi sumdawnna lamah tawnhriat a nei ṭha lo hle niin an sawi.