Joe Biden-a'n a Cabinet member tur a ruat ṭan
US President atana thlan, Joe Biden chuan a cabinet member turte a ruat ṭan.
Biden chuan secretary of state atan Antony Blinken, secretary of homeland security atan Alejandro Mayorkas, director of national intelligence atan Avril Haines, national security adviser atan Jake Sullivan, UN-a US ambassador atan Linda Thomas-Greenfield leh special presidential envoy for climate atan secretary of state hlui John Kerry-te a ruat.
Cabinet member atana Biden-a'n a ruatte zingah hian vice president a nih lai, US President hlui Barack Obama hunlaia official eng emaw zat an tel. Biden-a adviser leh a thawhpui ṭhin hnai tak takte an ni hlawm. National intelligence director atana a ruat, Avril hi CIA director hlui a ni a, hmeichhe zinga he dinhmun chelh thei hmasa ber a ni.
Trump-a'n transition kalpui ṭan remti
US President Donald Trump chuan inthlanah a chak loh a pawm thu la sawi lang lo mah se, President atana thlan thar hnena thuneihna hlanchhawn a nihna tura ṭul angte chu General Services Administration (GSA) in a buaipui ṭan a remti tih a sawi.
Tun thlengin inthlan result kimchang hi tihchhuah a la ni lo a, mahse GSA chuan Biden chu hnehtuah a pawm tawh tih a sawi. President-in GSA leh Biden transition team-te thawhdun a remtih thu a sawi tak avangin nakkum January 20-a thuneihna hlan a nihna tur atana Biden a inbuatsaihna kawngah fund hman theihna te, official-te meeting neihpui te an ti thei dawn ta a ni.