US President thar Donald Trump la lut

US President 45-na atan Republican Donald Trump chu nimin khan lakluh a ni.

President lakluh hi an ram sanaa chhun dar 12-ah Capitol Building-ah neih ṭan a ni a, India ramah erawh chuan Zirtawpni zan dar 10:30 a ni thung. President rual hian Vice President thar pawh lakluh nghal a ni.

President lakluh hma ni, Ningani khan Donald Trump leh Vice President-elect Mike Pence-te chuan Arlington National Cemetery-a sipai thlan, Tombs of the Unknowns-ah pangpar an dah a, ram tana nunna hlantute zahna an lantir a ni.

Hemi hnu hian Lincoln Memorial-ah darkar hnih awh public concert neih a ni a, he hunah hian country star Toby Keith, soul singer Sam Moore, actor Jon Voight leh The Piano Guys-te an inlan.

Ningani zan khan Washington-ah Inaugural Dinner buatsaih a ni bawk a, he hunah hian Trump chuan campaign laia hnehna an chan theih nana theihtawp chhuahtute, a chhungte leh donor-te lawmthu a hrilh. Trump chuan an rin phak bak result an nei tih sawiin, President chuh tawhte zingah an thawkrim bera a rin thu a sawi bawk.

Nimina President thar lakluh inkhawm hi Missouri Repulican senator leh Joint Congressional Committee on Inaugural Activities chairman Roy Blunt-an a kaihruai a, US Supreme Court Chief Justice John Roberts chuan President thar hi rinawmna thu a tiamtir a ni. President thar hian thu a sawi nghal bawk.

Washington khawpuiah President thar pual hian inaugural ball-te huaihawt a ni dawn bawk a, heng hmunah hian President leh First Lady Trump, Vice President leh a nupui Mrs Pence-te'n an telpui ang.

Kum 1933 thleng khan US president tharte hi March 4, inthlan neih aṭanga thla li hnuah lak luh an ni ṭhin a, mahse hei hi siamṭhat a nih hnuin, lakluh hun hi thla hnihin tihhnaih a ni.