Senegal-ah Gambia president thar la lut

Gambia ram president, Yahya Jammed-a'n pesident thar thlan hnenah thuneihna hlan chhawng duh lo a, an ram pumah emergency a puan zui avangin Ningani khan president thlan thar, Adama Barrow chu Senegal rama Gambia embassy-ah rinawmna thu tiamtira lakluh a ni.

Kum 1994-a sorkar paihthla a, thuneihna changtu Yahya Jammeh hian nikum December 1-a President thlanna neiha Adama Barrow thlan tlin a ni chu a pawm lo a, president a nihna aṭang pawhin a bang duh lo a ni.

West Africa regional block, Eco­was chuan Jammeh hian thu­neih­na a hlan duh lo a nih chuan sipai chakna pawh hman a ngai mai dawn niin a lo vau tawh a ni.

Gambia President thar lak­luh hun atan hian January 19, Ningani kha ruat lawk a ni. He­tih­lai hian Senegal rama himna zawnga awm mek, Adama Barrow hi lakluh a nih dawn hma chu a himna atan an rama kir rih lo tura hrilh a ni a, mahse emergency puan zui a nih tak avang leh, Parlia­ment-in Jammeh-a term chu ni 90 chhung atana a pawhsei avangin an ramah kir loin Senegal-ah president atan hian lakluh a ni ta a ni.

President thar atana Barrow lakluh a nih hnu hian United Nations Security Council chuan Barrow a thlawpna resolution a siam nghal a, boruak ṭha tak hnuaiah thuneihna pawh inhlanchhawn a nih theih ngei an beisei thu an sawi.

Barrow-a hnena thuneihna hlanchhawn a nih theih nan West Africa sipai eng emaw zat chu Gambia ramriah dah an ni tawh a, Senegal sipaite chuan a ṭul huna Gambia ram lut turin an inpeih tih an sawi.

Ningani vek khan kum 1997 aṭanga Jammeh-a hnuaia vice president dinhmun chelhtu, Isatou Njie Saidy chu a bang a, cabinet member pariat pawh bangin Jammeh hi an thlawp dawn lo tih an sawi bawk.