US-ah drug lord 'El Chapo' Guzman thawn
Mexico sorkar chuan ruihhlo tawlhrutu pawl lian hotu, Jaoquin 'El Chapo' Guzman chu US-ah a thawn. Guzman hian US-ah ruihhlo tawlhruk thubuai bakah thubuai dang eng emaw zat a nei a ni.
Ningani khan US-a a thubuaite hmachhawn tur hian New York-ah Guzman hi thlenpui a ni. Guzman hian Mexico ramri bul khua, Giudad Juarez aṭangin New York panpui a ni a, niminvek khan Brooklyn-a federal court-ah hruai nghal a ni.
El Chapo Guzman hi khawvel-a ruihhlo tawlhrutu lian ber zing ami a ni a, Mexico rama venhimna ṭha tak tan-in aṭangin ṭum hnih a tlanchhuak tawh a ni. Kum 2015 khan a tanna cell hnuaia km khat-a thui leiverh aṭangin a tlanchhuak a ni. Mahse kum 2016 khan man leh niin, man a nih hnu hian US chuan an rama thawn turin Mexico sorkar hi a ngen a ni.
Guzman hian New York bakah, San Diego, Chicago leh Miami-ahte thubuai a nei bawk a, a thubuaiah te hian thiam loh chantir a nih chuan US tan-inah damchhung tang tura hrem theih a ni ang.
Hetihla hian Guzan-a ukil chuan US-a thawn a nih dan hi dan loa kalpui leh, hriattir lawkna awm lo niin a sawi a, he thil hi Mexico sorkarin politics a khelhna hmanrua a ni, a ti.
Kum 2016-a man nawn leh a nih hnua interview a neihah, Guzman hian a thiltih avanga a inchhir thu a sawilang lo. Kum 15 mi a ni laiin dam khawchhuah nan ruihhlo tawlhruknaah hian inhnamhnawih tih a sawi a, a hnuah amah ngei pawhin poppy te chu a ching zui tih a sawi.