Sri Lanka Prime Minister-in banna a thehlut ; Mipui lungawi loten PM chhungkaw in halsak

Sri Lanka sum dinhmun tlakchhiat vanga an buaina kal zelah, Thawhṭanni khan prime minister Mahinda Rajapaksa thlawptu leh sorkar laka lungawi lo mipuite inkara buaina chhuak vangin Curfew puan a ni leh. Buaina chhuakah hian rorellai MP pakhat a thi a, mi eng emaw zatin hliam an tuar.

Buaina a chhuah hnu hian PM Rajapaksa chuan banna a thehlut a, a kaihhruai sorkar pawh a tluchhe zui ta a ni.

April 9 aṭang khan mipui lungawi lote chu President Office kawtah an inkhuar tawh a, Thawhṭanni zing khan heng mite hi president Gotabaya Rajapaksa leh a unaupa, PM Mahinda Rajapaksa thlawptute chuan an bei a ni. Anni hian lo bei let vein, buaina a chhuak zui a, mipui lungawi lote hian bus-te halin, President nu leh pa hriatrengna hmun siamte an tichhia a, Colombo aṭanga km 250 vela hla, Hambantao-a Rajapaksa chhungkaw in pawh an halsak bawk. Hei bakah hian minister hlui pathum leh MP pahnih in pawh an halsak bawk a ni.

Police-te chuan President Office kawta mipui pungkhawmte hnawhdarh nan hian tear gas leh water cannon-te an hmang a, a hnuah curfew hi puan zui a ni. MP Amarakeerthi Athukorala chuan Nittambuwa-ah pungkhawmte lamah silai hmetpuakin, a motor daltu mi pahnih chu na takin a kap hliam a, mahse a hnuah punkhawmna bul buildingaa tlanchhiatnaah a ruang hi hmuh a nih thu police officer-te chuan an sawi.

Kum 76 mi, prime minister Mahinda Rajapaksa chuan buaina a chhuah hnuah a nau, president Gotabaya Rajapaksa hnenah banna lehkha a thehlut a, cabinet minister pahnih pawh an bang ve nghal bawk.

Banna lehkha a thehluhah Rajapaksa chuan, "Ramin economy lama harsatna a tawh mek khaichhuahna tura all-party sorkar siam a nih theihna turin PM ka nihna aṭanga banna ka thehlut a ni," tiin a ziak.