Phillipines President thar tur Ferdinand Marcos Jr

Phillipines President thar thlanna neih takah official-in result kimchang tihchhuah la ni lo mah se, Phillipines dictator hlui fapa, Ferdinand "Bongbong" Marcos Jr chu a tling tih a chiang tawh.

Nimin khan vote tla zinga 94% chu chhiar zawh a ni tawh a, kum 64 mi Marcos Jr hian 55.8% hmuin majority nei tura hmuh ngai zat a hmu pha tawh. Amah hnaih bertu, vice president ni lai Leni Robredo chuan 28% chauh a hmu pha thung.

Marcos Jr hi Philippines President 17-na a ni dawn a, presidnet ṭanglai Rodrigo Duterte kut aṭangin thuneihna a la chhawng ang. Kum 36 hnuah Marcos chhungkuain thuneihna an chang leh thei dawn ta. Marcos Jr a pa, president hlui Ferdinand Marcos kha rorelna rawng taka kalpui ṭhin a ni a, Marcos Sr bakah a nupui Imelda leh an laina hnaite'n mipui chanai USD tluklehdingawn 10 dawn an rawk avangin kum 1986 khan mipui chuan helna chawkchhuakin an thuneihna aṭangin an paihthla a ni.

President thlan rual hian senator, lower house member leh regional official-te thlan a nih avangin official result tihchhuah nan hian hun eng emaw chen a la ngaih rin a ni.