Saudi Arabia-ah Israel PM zin

Israel prime minister Benjamin Netanyahu chu Pathianni khan Saudi Arabia ramah zinin, an crown prince Mohammed bin Salman nen an inhmu tih Israel official chuan a sawi. 

Netanyahu zin tur chungchang hi a hmain engmah puanzar a ni lo a, mahse Pathianni khan Israel media-te chuan a rukin private jet  hmangin Netanyahu hi Red Sea bul, Neom-ah a kal a, Crown Prince Mohammed bin Salman leh U.S. Secretary of State Mike Pompeo-te nen inbia niin an tarlang. 

Hetih lai hian crown prince leh Netanyahu-ten meeting an nei nia sawi hi Saudi Arabia foreign minister, Faisal bin Farhan Al Saud chuan a pha thung. Prince Faisal chuan amah ngeiin airport-ah Mike Pompeo chu va hmuin, meeting-naah a kalpui hnuah airport-ah bawk a thlah let tih a sawi. Meeting-ah hian Israel PM hi a tel lo a, Saudi leh American official-te chauh an tel a ni, a ti. 

Saudi Arabia hi Palestinian thlawptu nghet tak niin, Israel official nena inzawmna neih hi a duh ngai lo a ni. 

Pathiannia thu a sawiah, Israel prime minister Benjamin Netanyahu chuan US President tana thlan thar, Joe Biden hnena a thu chah a sawi tel. President Donald Trump-a'n a lo chhuahsan tawh, 2015 Iran nuclear deal chu US chuan a pawm leh tawh tur a ni lo, a ti. 

Nakkum January 20-a US President thar atana lakluh tur, Joe Biden hian US hian Iran nuclear deal hi chhuahsan tawh mah se, Iran-in thawhhona tur duante khauh taka a zawm dawn chuan inremna hi an zawm leh ang, tiin a lo sawi tawh a ni. 

President Trump chuan kum 2018 khan nuclear deal an siam chungin, Iran chuan ballatistic missile programme a kalpuinaah khuahkhirhna a siam chuang lo a; Iraq, Lebanon, Syria leh Yemen-a helte a thlawp chhunzawm reng nia sawiin, he inremna siam aṭang hian a inhnukdawk a ni. 

Netanyahu chuan US chu a inhnuhdawh tawhna, nuclear deal-ah hian kir leh tur a ni lo a, Iran-in nuclear ralthuam a siam tur danna atana an policy siam chu nghet taka an zawm zel a ṭul a ni, a ti.