Ecuador tan-ina buaina chhuakah mi ṭhahnem tak an thi

Ecuador ram tan-ina misual pawl rual (gang) zinga intihbuaina thleng vangin mi ṭhahnem tak an thi. South America ramah hian tanin chhunga inthahna rapthlak tak hi a lo thleng fo tawh a ni.

Thuneitute chuan Thawhṭanni khan Ecuador khawpui Quito aṭanga km 80-a hlaa awm, Santo Domingo de los Colorados-a Bellavista prison-ah pawl pahnih Los Lobos leh R7 inkarah buaina hi a chhuah thu leh, mi 43 an thi tih thuneitute chuan an sawi.

Nikum September thla khan Quito aṭanga km 400 vela hla, Guayaquil-a tan-inah buaina chhuak vangin tang zinga 100 chuang an lo thi tawh bawk a, he thil thleng vang hian sorkar chuan state of emergency puangin police leh military force eng emaw zat chu taninah hian a tir nghal a ni.

Ecuador rama tan-in hrang hrangah mi 35,000 vel an tang mek a, hei hi tan-in tang thei zat tura bithliah aiin 15% zetin an tam. Sorkar chuan tan-in hrang hrang tawt lutuk tihziaawmna turin tang 2,000 vel ngaihdam a lo tiam tawh a ni.