US President tharin hna a thawk ṭan

Donald John Trump chu kar kalta Zirtawpni zan khan US President 45-na atan rinawmna thu tiam tira lakluh a ni ta.

President thar hi Wa­shington DC-a US Capitol Building West Front-ah US Supreme Court Chief Justice, John Roberts-a’n rinawmna thu a tiam tir a ni. President thar lakluh a nih dawn leh, lakluh a nih hnuah hian kohhran hrang hrang aiawhten an ṭawngṭai sak. Ṭawngṭaina hun hmangtute zingah hian thuhriltu hming­thang, Billy Graham-a fapa Rev Franklin Graham pawh a tel.

Donald Trump-a lakluhna inkhawmah hian US President hlui panga la dam zinga pathum an tel a, Jimmy Carter, Bill Clinton leh George W Bush-te’n an telpui a ni. President lak luh a nih hma hian Mike Pence chu Vice President atan lak luh a ni bawk a, he inkhawm buatsaih nan hian dollar mtd. 70 vel hman ral nia sawi a ni.

US President thar atana lakluh a nih hnua thu a sawiah, Donald Trump chuan thuneihna chu mipuite kutah pek kir a ni dawn ta tih sawiin, President ni tura rinawmna thu a tiam chu America mipuite tana rinawmna thu a tiamna a ni tih a sawi. America chu ram ropuiah an siam leh dawn tih a sawi.

Commander-in-Chief atana lakluh a nih hnuah, Donald Trump leh a team chuan hna an thawk ṭan nghal. Trump hian President a nih anga bill a sign hmasak ber chu Defence Secretary atana Gen James Mattis dah a remtihna a ni. Defence Secertary ni tur hian military service aṭanga kum sarih an chawlh phawt a ngai a, mahse hei hi Mattis hian a phak loh avangin President pawmpuina a neih a ngai a ni.

President Trump chuan cabinet member atana a ruat, la nemngheh lohte list chu Senate-ah a thawn nghal bawk.

Zirtawpni zan vek khan Trump hian President kalchhuak ta, Barack Obama healthcare scheme ‘Obamacare’ tia sawi thlakna tur a buaipui zui nghal a ni. Trump chuan sorkar agency leh department hrang hrang hnenah Obamacare vanga sum lama harsatna awm mekte tihzianawm dan kawng zawng turin a hrilh nghal a, he scheme thlakna tur hi a kaihhruai sorkar leh Congress chuan an buaipui zui dawn a ni. Trump chuan Obama’n a president hun tawp lama Federal Housing Administatrion kaltlanga policy guideline a siamte chu a titawp lailawk bawk.

President Trump chuan National Day of Patriotism hmanna tur thupek a ziak nghal bawk a, mahse hei hi eng ni-ah nge hman tur tihchian a la ni lo. President hian hemi pual hian sorkar holiday a puang thei dawn a ni.

Sorkar thar chuan White House website pawh a update nghal a, President thar chuan Pre­sident hlui, Barack Obama hnuaia policy kalpui, ram tana ṭha lo leh ṭangkai lo nia ngaihte titawp a tum zel dawn tih pawh an tarlang a, heng zingah hian Obama Climate Action Plan leh environment kaihhnawih dang policy-te pawh a tel.

President Trump chuan White House a luh hnu reiloteah a thlak danglam tir nghal a, Bri­tain Prime Minister hlui Winston Churchill-a lim chu dahin, thil dang pawh a thlak danglam nual bawk. Churchill-a lim hi Barack Obama hunlai, kum 2009 khan White House-a Treaty Room pawn lamah dahchhuah a ni a, dahchhuah a nih tirh pawh hian inhnialna a siam tam phah hle a ni. Mahse President thar hian a dah let leh a ni.