Trump-a’n White House senior adviser atan a makpa chhawr thei

US Department of Justice chuan President thar Donald Trump chuan a makpa, Jared Kushner chu chhungkhat laina induhsak khapna dan bawhchhe loin White House senior adviser atan a chhawr thei dawn niin a tarlang.

Office of Legal Counsel-in a tarlan danin, President-in federal agency hotu atan a chhungkhat laina hnai a ruat khapna dan, anti-nepotism law chuan White House-a thawk tur a huam tel lo niin a sawi.

Jared Kushner hi Trump-a fanu upa ber, Ivanka Trump-i pasal a ni a, real estate investor leh developer a ni. Campaign lai aṭangin a makpa hi a thurawn lakna pawimawh tak leh mi ṭangkai tak a ni. Trump hian chanvo pawimawh tak a pek ngei rin a ni a, mahse chhungkhat laina induhsakna khapna dan a awm avangin a ngaihven zui a hlawh hle.

Justice Department chuan President Trump hian official-ah Kushner hi a chhawr a, White House staff-te security clearance ang a pe duh a nih chuan danin a khap tel lo tih a sawi a, mahse a chhawr a nih chuan Kushner hian danin khuahkhirhna chin a siam angte chu a zawm ve vek a ngai dawn a ni