Trump-a’n UK leh Mexico hruaitute hmu dawn

US President thar Donald Trump chuan UK Prime Minister Theresa May leh Mexico President Enrique Pena Nieoto-te meeting a neihpui dawn tih White House thupuangtu, Sean Spicer chuan a sawi.

President a nih hnua ramdang hruaitu a hmuh hmasakna ber turah hian, Trump chuan January 27-ah Theresa May hi a hmu dawn a, January 31-ah Nieto nen meeting an nei bawk ang.

US President 45-na tura Donald Trump lakluh a nih hnu khan, British PM chuan US leh UK-in inzawmna ṭha tak an neihte vawnnun zel a duh thu a sawi. Ram pahnih hruaitute hian insumdawnna chungchangte an sawidun rin a ni.

Mexico President Nieto pawhin Inrinni khan telephone-in Trump hi a bia a, ram pahnihten thawhdunna ṭha an neih a duh thu te a sawi a, meeting-ah hian insumdawn tawnna, pem lut leh security chungchangte an sawidun ang.

Spicer chuan Trump hian Canada Prime Minister Justin Trudeau pawh phone-a a biak thu sawiin, hruaitu pahnihte hian meeting neih dun thuai pawh an remti a ni, a ti.

Israel Prime Minister Benjamin Netanyahu pawhin US President thar hi Iran chungchang sawipui thuai a tum thu a sawi. President atana lakluh a nih hma khan Trump hian Iran leh world power ram paruk-te’n nuclear deal an lo ziah tawh chu a lo sawisel fo tawh a ni. Kum 2015-a inremna an ziah hi Netanyahu chuan na takin a dodal a, Iran nuclear programme kalpui chu Israel tan a hlauhawm thu a sawi. Israel President Reuven Rivlin pawhin Trump hi Israel ram tlawh turin a sawm a ni.