Trump-a’n media mite bei let

US President Donald Trump chuan President atana lakluh a nih ṭuma mipui pungkhawm zat chungchangah media mite chu thu dik lo thehdarhah a puh a, journalist-te chu mi rinawm lo ber nia a ngaih thu a sawi.

Trump chuan President lakluh inkhawmah khan mi tam tak an pungkhawm a, mahse a hnuah TV ṭhenkhatah chuan mipui awm mang loa ruak huai angin an lantir a ni, a ti. Media lam chuan Trump-a chu mipui a ko khawm zo lo angin an tarlang a, dik lo taka report thehdarhtute chuan a sawhkhawk an la tuar mai thei niin a sawi.

Reporter pakhatin Trump-a’n Martin Luther King-a lim a dahbo nia a sawi chungchang pawh chhang letin, Trump chuan he lim hi a awm reng a, camerman pakhat a hmaah a din avangin a lo hliah mai a ni, a ti. Hrechiang loa thu dik lo an thehdarh chuan media mite rinawm tawk lohzia a tilang chiang hle a ni, a ti. US President chuan thudik duh mi a nih thu sawiin, report pawh dik tak a duh tih a sawi.

White House Chief of Staff Reince Priebus pawhin President Trump chung­changah media lam chetdan chu a dem thu a sawi bawk. Fox News Sunday-in a kawmnaah, Priebus chuan, “Mipui tam leh tam loh lam chu a pawimawh ber a ni lo. President a nihna zah lo leh tinep zawngin an bei a ni. Hetianga beihna hi ngawi rengin kan thlir mai dawn lo” a ti.