Gambia sorkar sum tam tham tak bo

Gambia president hlui, Yahya Jammeh chu ram danga inhumhimna zawnga a tlanchhiat hnuah sorkar sum maktaduai 11 chuang a bo niin President thar, Adama Barrow-a adviser Mai Ahmad Fatty chuan a sawi.

Jammeh hi president aṭanga a ban duh loh hnuah, Economic Community of West African States (Ecowas)-in sipai inrawlh tir tuma an vau avangin kar kalta Inrinni khan ban a remtih thu a sawi a, an ram a chhuahsan zui nghal bawk a ni.

Regional hruaitute nena hun rei tak an inbiak hnuah Jammeh hian Inrinni khan a bungrua tam tham tak nen Gambia ram hi chhuahsanin, Guinea ram a pan nia sawi a ni. Fatty chuan bungraw phur thlawhtheihna chuan Jammeh-a bungruate hi a phurh chhuak sak niin a sawi a, heng zingah hian motor pawh eng emaw zat a tel a ni, a ti. Gambia airport official-te chu Jammeh-a bungrua te chu phurh chhuah lo phalsak tawh lo tura hrilh an nih thu a sawi bawk.

Hetih lai hian Gambia president thar, Adama Barrow chu Senegal ramah a la awm a, an rama a kir hun tur a la sawichiang lo. West Africa sipaite chu Gambia khawpui, Banjul-ah Barrow-a kir hun tur atana inbuatsaihin an awm mek a ni.

Fatty chuan sorkar sum dahna chu a ruak niin a sawi a, hei hi ministry of finance technician leh Central Bank of Gambia pawhin an sawichiang tawh a ni, a ti. Kar hnih chhungin Jammeh hian sorkar sum, dollar matkaduai 11 chuang hi a lo chheprelh hman nia sawi a ni.