Israel-in in sak khuahkhirhna a hlip

Israel Prime Minister Benjamin Netanyahu chuan East Jerusalem-a in sak thar khuahkhirhna siam chu a hlip tih a sawi.

City municipal government-in East Jerusalem-a in thar sak phalna pek a remtih hnuah, PM Netanyahu chuan khuahkhirhna an lo siam tawh chu a hlip tih Pathianni-a cabinet meeting-ah a sawi a ni. Netanyahu chuan, “East Jerusalem-a chenna-in sakna tur hian midang dil buai a ngai lo a, kan duhna hmunah leh, kan duh zat zat kan sa thei a ni” a ti. West Bank-a in sak belh pawh phalsak thuai a tum tih a sawi bawk.

Meeting-ah hian West Bank-a Israel mi 40,000 dawn chenna, Maale Adumin bial chu Israel ramah dah lut tura rawtna bill chungchang sawiho hun pawh sawnhlat a ni bawk.

Kum 1967 Middle East war hnua Israel-in Palestinian ram a luah, West Bank, East Jerusalem leh Golan Height-ah Israel mite chenna tur in a sakah hian Juda mi 500,000 chuang an cheng mek a ni.

Security Cabinet chuan he bill hi Netanyahu-a’n US President thar, Donald Trump-a a hmuh hnuah sawiho a ni dawn niin a tarlang.

US President thar Donald Trump chuan Israel Prime Minister Benjamin Netanyahu chu February thlaa US-a zin turin Pathianni-a an inbiaknaah a sawm.

Israel PM office chuan thuchhuah siamin, US President-in Netanyahu a biak thu hi a tarlang a, US-a a zin hun tur ni pawh relfel thuai a nih tur thu a sawi.