China-in Covid-19 test runpui nei

China thuneitute chuan kar liam taa an rama khawpui pathum, Tianjin, Shanghai leh Manzhouli-ah tualchhung aṭanga Covid-19 kai hmuhchhuah thar an awm thar leh avangin heng khawpuiah hian test runpui a nei mek. 

Hri kai hmuh chhuah thar hi tam lo mah se, China chuan hri darh zel tur venna atan hian hma a la nghal a, lockdown puangin school te khar a ni a, mi maktaduai tel chu test a neihpui tawh a ni. 

Sorkar official leh health expert-te chuan khua a vawh chhoh ṭan avangin hri darh theihna hi a nasa zual tih an sawi a, hei vang hian a darh hluai tur venna atan ṭan an la nghal a ni. 

Hri darh zel tur venna atana test runpui neih hi China hi a hma pawhin a lo kalpui tawh. May thla khan Covid-19 hri lo chhuah ṭanna, Wuhan khawpuia cheng mi maktaduai 11-te chu test neihpui an lo ni tawh bawk. 

China ramah hian hri len ṭantirh aṭangin Covid-19 kai hmuh chhuah tawh hi mi 92,000 an awm a, an zinga 4,634 in an thihpui tawh a ni. Mahse hri kai zat an chhinchhiahnaah hian taksa lama natna nei lo, asymptomatic te chu chhiar tel an ni lo thung.