US President-in TPP deal aṭangin US hnukdawk

US President Donald Trump chuan inthlan dawna a lo tiam tawh angin, Trans-Pacific Partnership (TPP) deal aṭanga US inhnuhdawhna tur thupek a ziak ta.

Thawhṭanni khan Oval Office ceremony neihnaah President Trump hian he thupek hi a ziakfel nghal a, hemi chungchang hi hun rei tak an lo sawi tawh tih sawiin, inremna siam aṭanga inhnuhdawh chu American worker-te tana thil ṭha zawk a ni, a ti.

President Trump chuan sorkar laipui hnuaia hnathawktu lak belh tawh lohna tur thupek a siam bawk a, mahse hei hian sipai lam a huam tel lo thung. Trump hian sorkar hnathawk tihtlem a tum a, hei hi hnathawktu lam chuan an sawisel nasa hle. Hei bakah hian US NGO, sorkar sum dawng ṭhinten ram danga nau an titlak sak ṭhin khapna thupek pawh a siam nghal bawk.

TTP deal hi President hlui kalchhuak ta, Barack Obama hnuaia ziah a ni a, mahse he inremna hi US Congress chuan a la pawmpui lo. Kum 2015 khan ram 12 te chuan insumdawn tawnna kawnga inremna thuthlung hi an ziak a, a taka kalpui erawh a la ni lo. He inremna hi chhiah la mumal loa insumdawn tawnna tur a nia, inremna thuthlung ziaktu ram dangte chu Australia, Brunei, Canada, Chile, Japan, Malaysia, Mexico, New Zealand, Peru, Singapore leh Brunei-te an ni a, heng ramte economy hi khawvel pum economy 40% an tling phak a ni.

January 20-a US President atana lakluh, Donald Trump chuan a campaign lai aṭangin he inremna ziah hi thil ṭha lo tak niin a lo sawi fo tawh a, chhiah awm mumal loa insumdawn tawnna kalpui chu US chuan a tuar nasa ber dawn tih sawiin, an thawhpui ramte chu security atana sum tam zawk dah turin a phut.

Thawhṭanni vek khan Trump chuan White House-ah US-a thil siamtu eng emaw zat a hmu bawk a, inkaihhruai dan khauh tak awmte siamṭha a, corporate tax tihniam a tiam. Hemi rual hian sumdawnna kawngah thil dik tawk lo an ti a nih chuan action a lak tur thu a sawi nghal bawk. President thar chuan ram danga thil siamchhuahna hmunpui te US ram chhungah lakkir leh a lo tiam tawh a ni.