Nagaland sorkar leh Amazon India thawkdun

Ralchah dawr Amazon India leh Nagaland sorkar-te chuan Thawhṭanni khan Skill Development tihhmasawnna turin inremna an ziak.

Inremna ang chuan National Skill Deve­lopment Corp (NSDC) hnuaiah Nagaland-a ṭhalai, a bikin hmeichhia te chuan hamṭhatna an nei thei dawn a ni. Amazon India chuan training leh skill development workshop-te a buatsaih ang a, state chhunga ṭhalai hmeichiaten online-a sumdawnna an kalpui theih nan zirtirna an pe dawn a ni. State Principal Secretary Temjin Toy chuan, ṭhalaite tana e-entrepreneur lama Amazon-in kawng an hawnsak chu lawmawm a tih thu sawiin, an ṭang­kaipui ngei a beisei thu a sawi. He programme hnuaiah hian industry din­na tur thlenga hmalakna kalpui a ni ang.

Amazon India Director and General Manager Gopal Pillai chuan, ṭha­laite chu training, skill development workshop, technology support leh market access lamah te zirtirna pek a nih tur thu sawiin, cottage industry din tura hma lak a ni ang, a ti. A thawh khatna atan Thawhṭanni khan state khawpui Kohima-ah ni hnih awh 'skill development workshop' buatsaih nghal a ni, a ti bawk. Amazon hian May 2016 khan India ramah 'Global Selling Prog­ramme' a kalpui ṭan a, tunah hian India thil siamchhuah ‘Make in India’ product ṭhahnem tak zawrhchhuah a ni tawh.