Nagaland-ah tribal pawl-ten nawrh huaihawt leh

Nagaland sorkarin Urban Local Body (ULB) election neih tura hmeichhe tan seat 33% a hauhsak duh lohna lantirin, tribal pawl hrang hrangte chu Dimapur-ah Thawhṭanni khan an pungkhawm.

Tribal pawl hrang hrangte chuan hmeichhe tana seat hauhsak an duhlohna thuziak tarlangin, an auchhuahpui a ni. Joint Co-ordination Committee (JCC) buatsaih lungawilohna lantirnaah hian Ao, Lotha, Sumi, Chakhroma Public Organization, Western Chakhesang Hoho (WCH), APO leh ENPO-te an tel. Pungkhawm te chuan Chief Minister TR Zeliang chu January 26 ral hma ngeia sorkar thutlukna lo siam tawh sut leh turin an phut a ni.

JCC hruaitu Supu Jamir chuan nawrh an huaihawt chhan sawiin, dikna chu an duh ber a nih thu a sawi. Hmeichhe tana seat 33% hausak chu dan kalh nia sawiin, sorkar chu a thutlukna lo siam tawh sut leh tura an phut thu a sawi. APO president Dr Vilhusa Seleyi pawhin hmeichhe tana seat hauhsak chuan India danpui Article 371 (A) a bawhchhia niin a sawi. He hunah hian Lotha Hoho chairman Etsungmomo Kikon, Western Sumi Hoho president Zheshito Swu leh Naga Mothers’ Association (NMA) aiawhte chuan thu an sawi ve bawk.

February 1-a UBL election neih turah hian Nagaland sorkar chuan hmeichhe tan seat 33% a hauhsak a, hei hi tribal-te chuan nasa takin an dodal a ni. Hetih lai hian CM TR Zeliang chuan hmeichhe tana seat hauhsak chu danin a phut leh zawm ngei ngai niin a sawi thung. Tribal-te chuan election hi an boycott tur thu an lo puang tawh a, candidate-te pawh inhnukdawk leh turin an ngen. Tribal-te ngenna avang hian candidate eng emaw zat chu an inhnukdawk a, candidate awm zawng zawng inhnuhdawh vekna bial eng emaw zat a awm a ni.