South Korea President thar Yoon Suk-yeol lalut

South Korea president thar Yoon Suk-yeol chu Thawhlehni khan rinawmna thu tiamtira lakluh a ni ta.

President atana lakluh a nih hnuah thu a sawiah Yoon chuan an ṭhenawm, North Korea chungchang sawichhuak nghalin, nuclear enchhin lam leh nuclear weapon program changtlung tak nei tura chak taka inbuatsaih nei chho mek North Korea chu nuclear ralthuam tel loa hmathlir thui tak nei zawk turin a sawm zui a ni.

SKorea hmelma lian ber chu NKorea a ni tia sawi ṭhintu, Yoon hian an ṭhenawm ram NKorea chu nuclear ralthuam tel loa an economy siamṭhat pui turin ramdangte chu ruahmanna ṭha tak duanpuiah a sawm nghal bawk. Hemi rual hian inremna siam turin engtik lai pawha kawng an hawn reng thu a tarlang.

North Korea-in nuclear ralthuam a tihtawp chuan Korean Peninsula leh a piahlam thleng pawhin inremna tluantling leh daihrei zawk a siam thei dawn a ni, tiin SKorea President thar chuan a sawi.

Kum 61 mi, Yoon hi politics lama mi thar niin, a hma hian prosecutor a ni ṭhin. Hri leng vanga an ram economy dinhmun tlahniam te, thil man sangte a thlen mek laiin ram hruaitu atana lakluh a ni a, chona hautak tak a hmachhawn nghal dawn a ni.

Yoon chuan khawvela economy lian 10-na, SKorea chu khawvel pum huap thil buaipui kawngah hei aia tam zawka inrawlh ṭha a tih thu leh climate change, supply chain management leh energy lama buaina an tawhte chu ngaihpawimawh hmasakah a neih dawn thu a sawi a. Yoon chuan US leh SKorea inkara inlaichinna leh thawhduna ṭha siam chu a policy pawimawh ber a nih tur thu a sawi bawk.

Seoul-a National Assembly-a President thar lakluh inkhawmah hian mi 40,000 bawr vel an tel a, an zingah hian South Korea politician leh sumdawng liante an tel. Lakluh inkhawm a zawh hnu hian President chenna, Blue House compound chu mipuite tlawh theiha hawn a ni.