Sri Lanka-in dan bawhchhetute kah nghal theihna thupek tichhuak

Sri Lanka sorkarin Thawhṭannia tharum thawhna chhuak avanga mi pasarih thihna thleng leh, prime minister Mahinda Rajapaksa-a'n banna a thehluh phah hnuah, buaina chhuak zel tur venna atan sipai leh police-te chu emergency power pe in, dan bawhchhetute kah nghal theihna thuneihna a pe.

Defence ministry chuan security force-te chu sorkar property tichhia leh ru te leh, midangte nunna tiderthawng zawnga chete chu kap nghal turin thu pek an ni tih a tarlang.

Sri Lanka hian an ram chanchina economy lama harsatna lian ber an tawh mek laiin, lungawi lohna lantirin mi sang chuangte chuan sorkar laka lungawi lohna an lantir a, curfew puan a ni chung pawhin thupek zawm loin an la pungkhawm reng a ni. Ram sum leh pai dinhmun tlakchhiat avanga nitin mamawh thil man sang chak lutuk te, ei tur leh damdawi, fuel indaih lohna thleng mekah sorkar chu mawhphurtuah puhin mipuite hian lungawi lohna hi an lantir a ni.

Sorkarin thupek a siam tharah hian sipaite chuan dan bawhchhia nia sawi chu police kuta an hlan hmain darkar 24 chhung an hreng thei a, private property khawi hmun pawh an dap thei bawk a ni. Police-te chuan an mi mante chu an hnaih ber police station-ah an hruai zel tur tih a ni bawk.