Trump-a’n Keystone XL, Dakota pipeline project pawm

US President Donald Trump chuan Keystone XL leh Dakota Access pipeline project thawh chhunzawmna tur thupek a ziakfel.

President hlui Barack Obama chuan environmentalist-te’n kum sarih zet an dodal hnuah kum 2015 November thla khan Transcanada Corps Keystone XL oil pipeline project hi a hnawl a ni. He pipeline hi Canada aṭanga Gulf Coast-a US refinery thlenga phum tum a ni a, ramri a paltlang tel avangin US sorkar pawmpuina neih phawt a ngai a ni.

Dollar tluklehdingawn 3.8 senga siam tum, Dokata Access Pipeline project pawh hi environmentalist-te’n nasa takin an dodal a, pipeline hi North Dakota Indian reservation paltlang tir tum a nih avangin hei hian Native America hmun pawimawh leh an tui lakna ber a tichhe tel dawn niin an sawi a, hun rei tak lungawi lohna an lantir tawh a ni. Mahse pipeline phumtu tur, Energy Transfers Partners chuan hei hi a dik loh thu leh, a him thu a sawi thung. He pipeline hmang hian North Dakota oil chu South Dakota leh Iowa kaltlangin, Illinois-a lawng chawlh hmunah pek tum a ni.