One-child policy thlahdul hnuah China-ah nau piang an pung

China sorkarin fa pakhat chauh neih phalna, one-child policy chu nikum khan a thlahdul a, policy thlahdul a nih hnuah nikum chhung khan China ramah naupiang 8% dawnin an pung.

National Health and Family Planning Commission chuan nikum chhung khan an ramah naupiang maktaduai 17.86 an awm a, kum 2015 aiin naupiang hi maktaduai 1.31 in a pung a ni. Naute nei thar zinga a tam zawk hi nupa, fa pakhat lo nei tawh an ni.

China sorkar chuan an ram mipui pung chak lutuk venna atan kum 1979 khan fa pakhat chauh neih phalna, one-child policy a siam a ni. Fa pakhat aia tam nei luite chu pawisa chawitir an nih bakah, hmun ṭhenkhatah chuan nau tihtlak tir an ni bawk. Mahse fa pakhat aia tam neih khap vang hian an ramah kum upa lam an tam a, hnathawk rual, ṭhalai an pung chak lo hle a ni. Hei vang hian he khuah­khirhna dan thlahdul duhna a awm chho a, thingtlanga cheng, nupa chu an fa hmasaah hmeichhia an nei a nih chuan fa dang pakhat an neih phalsak an ni phawt a, kum 2016 kumtir aṭang khan nupa tawh phawt chu fa pahnih an neih phalsak an ni zui ta a ni.

Sorkarin khuahkhirhna dan hi thlahdul mah se, nupa tam tak chuan sum lam harsatna avangin fa pakhat aia tam neih an duh chuang lo. China ramah hian in luah man a sang a, zirna in ṭhaa lehkha zir man pawh a hautak hle.