France President-in Colombia hel tlawh

France President Francois Hollande chuan Thawhlehni khan Colombia ram tlawhin, he rama helpawl lian ber FARC hruaitute chu an camp-ah a tlawh. Hollande hi Colombia President Juan Manuel Santos-a’n a ṭawiawm.

Colombia sorkar leh FARC helte hian nikum November thla khan inremna thuthlung an lo ziak tawh a, he inremna a taka kalpui a nih theihna tura European Union-in Colombia ṭanpuina a pek tur zinga 20% chu France hian a tum dawn a ni.

Hollande chuan Colombia sorkar leh FARC-te’n inremna thuthlung an siam chu a thlawptih a sawi a, khawvel ram danga tualchhung buaina thleng mek chinfelna tura entawn tur pawimawh tak a ni, a ti. Hollande hi kum 30 dawn chhunga France president zinga Colombia ram tlawh hmasa ber a ni.

Inremna ziahfel a nih tak avangin Colombia ram chhung hmun hrang hranga FARC helpawl camp chu tihchhiat a ni dawn a, helpawl member 5,700 vel chuan UN enpuina hnuaiah thla ruk chhungin sorkar kutah an ralthuamte an thehlut ang. Helpawl hian camp 26 vel an nei a, heng camp tihchhiat tur enpui tur hian UN observer 350 chuang tirh an ni.