Israel-in in 2,500 chuang sak belh tur thu puang

Israel sorkar chuan Pa­lestinian ram a luahsak, West Bank-ah Israel mite chenna tur in 2,500 sak belhna tur a puang.

Thawhlehni khan Israel Defence Ministry chuan thuchhuah siamin, in sak belh a nih thu hi a sawi. In sak tur zinga a tam zawk chu Palestinian nena inremna an siam tawhin a huam chin, tuna in din mekna block-ah sak a nih tur thu a sawi.

West Bank-ah hian Juda mi 350,000 vel an cheng mek a, East Jerusalem-ah mi 200,000 an cheng mek bawk. Heng hmunte hi kum 1967 Middle East war laia Israel-in Palestinian ram a laksak a ni a, a luahsak zui a ni.

Palestinian President Mahmoud Abbas-a thupuangtu, Nabil Abu Rdainah chuan Israel sorkar ruahmanna thar siam chu a dem thu a sawi a, hei hian nghawng ṭha lo tak a nei ngei dawn niin a sawi. West Bank leh East Jerusalem-ah hian Palestinian mi maktaduai 2.6 chuang an awm a ni. He thutlukna siam hian Israel leh Palestinian inkara boruak ṭha leh muan­awm siamna tura hmalakna a tibahlah thei tih a sawi.

West Bank leh Gaza Strip-a cheng Palestinian-te chuan independent ram din a, East Jerusalem chu an ram khawpui atana hman an duh a ni. Kum 2005 khan Gaza Strip aṭang hian Israel sipai leh Juda mi chengte chu an lo inlachhuak tawh a ni.

European Union chuan Israel-in Palestinian ram a luaha in sak belh a tum chu a sawisel a, state pahnih din tura hmalakna daltu niin a ngai. Ram dang tam zawk pawhin Palestinian rama Juda-te chenna in sak hi dan kalh niin an ngai. Mahse Israel chuan hei hi a pawm lo tih sawiin, an ram luah chu Bible leh an ram chanchinah pawh Israel ram chin a ni tih a sawi thung.