Trump-a’n Mexico ramri hungna tur thupek ziak
US President thar, Donald Trump chuan campaign laia a lo sawi tawh angin, US leh Mexico ramri hungna bang siamna tur thupek a ziak fel ta.
Nilaini khan President Trump hian Department of Homeland Security tlawhin, ramri hungna tur thupek hi a ziak a, hemi rual hian US ram khawpui zinga dan loa pemlut awm humtute dapchhuah beihpui thlak a ni dawn tih a sawi bawk. President hian chhim lam bialah dan loa pem lut mante dahna tur hmun zau zawk siamna tur thupek pawh a ziak nghal a, ramri venhna thawktute thuam chak nan US Border patrol agent 5,000 chhawr belhna tur thupek pawh a tel nghal a ni.
Trump chuan ramri hung chu ram pahnihte himna tur zawk a ni tih a sawi a, ramri awm lohna ram chu ram tia sawi tlak a ni lo tiin, US chuan a ramria thuneihna chu a nei let leh ta a ni, a ti. Ramri hungna bang siam chuan ruihhlo tawlhru ṭhin te, dan loa ralthuam kawl ṭhinte nuaibona tur leh, America rama aṭanga dan loa Mexico-a sum tam tak luanglut ṭhin venna tur pawimawh a ni, a ti.
White House thupuangtu Sean Spicer chuan, President thupek siam hmang hian chhim lam ramriah daidanna bang siam a ni dawn tih a sawi a, he bang siam tur hi campaign thutiam tihhlawhtlinna ringawt a ni lo a, ramri himna tura hmalakna pawimawh tak a nih thu a sawi. US-a ruihhlo tawlhrukna te, pawikhawihna thleng ṭhin te, dan loa pemlut awm ṭhinte a veng dawn a ni, tiin a sawi.
President Trump chuan ramri hungna bang hi reilote hnuah thawh ṭan a ni dawn tih a sawi a, a hungna senso chu Mexico-in US hnenah a rul let vek dawn a ni, a ti. Mahse bang hungna tura senso ruahman hi Congress-in a pawm ve leh phawt a ngai dawn a ni. US leh Mexico ramri hi km 3200 vela thui a ni a, a hungna bang siamna tur senso hi dollar tluklehdingawn 8-25 inkar vel ni tura ngaih a ni. Ramri hmun ṭhenkhatah chuan daidanna siam a ni.
Mexico President Enrique Pena Nieto chuan ramri hung tumna chu a dem thu a sawi a, a senso chu an tum ve dawn lo tih a sawi. “Mexico hian indaidanna bang siam hi a duh ve lo a, a hma pawhin ka lo sawi fo tawh a ni. Mexico hian bang siamna senso hi engzat mah a tum ve dawn lo” a ti. CELAC Latin America summit neihah, Latin America ram hruaitute pawhin Trump-a’n Mexico ramri hungna tur thupek a siam chu an dem thu an sawi.
Kumtinin Mexico aṭang hian dan loa US-a pem lut mi tam tak an awm ṭhin. Mexico-in a thil thawnchhuah zinga 80% chu US market-ah a lut a ni. Nilainia Morning Consult/Politico poll tihchhuahah, America mipui zinga 47% in ramri hungna siam hi an thlawp a, 45% in an duh lo.
US President thupek siam thar vang hian Mexico President Nieto pawhin US-a a zin tum chu a ngaihtuah ṭha leh dawn tih a sawi. Pieto hian January 31-ah US tlawh a, President Trump hmuh a tum a, mahse a zin tur chungchangah hian Trump-a official-te nena indawrna, Mexico high-level team report a nghak pawt dawn a ni.