Somalia hotel beihnaah mi 15 an thi

Somalia khawpui, Mogadishu-a Dayah Hotel chu Al-Shabaah firfiakten an bei a, mi 15 an thi a, mi dang 15 in hliam an tuar.

Internal Security Minister Abdirizak Omar Mohamed chuan Dayah Hotel beitute hi security officer-te’n bei letin, an kaphlum tih a sawi.

Nilaini zing khan firfiakte hian Dayah Hotel luhnaah car bomb an tipuak a, hemi hnu hian firfiakte chuan silai hmetpuakin hotel hi an luhkhung zui a ni. Bomb hi ṭum hnih tihpuah a ni a, hotel bula building leh car dingte pawh eng emaw zat a chhe tel. Bomb puak hnuhnung zawkah hian international news agency hnuaia journalist pasarih-in hliam an tuar tel a ni.

Hotel beih a nih lai hian a chhungah parliament member thlan thar ṭhenkhat an awm a, mahse an him niin police-te chuan an sawi. He hotel hi Parliament building bul hnaia awm a ni a, sorkar official leh roreltuten meeting neihna atan an hmang fo a ni.