Mosul-ah mi tam tak kir leh

Islamic State (IS) firfiak leh Iraq sipaite inbeihna avanga Mosul khua aṭanga tlanchhia mi tam tak chu Nilaini khan an khaw lamah an kir leh tawh.

Firfiakte kut aṭanga Mosul khua laklet tuma beihpui thlak mektu, Iraq sipaite chuan khawpui chhak lam bial chu an la let tawh a, heng hmun aṭanga tlanchhia, camp-a chengte chu an khaw lamah hian an kir leh ṭan mek a ni.

United Nations chuan nikum October 17-a sipaiten beihpui an thlak aṭang khan he khawpuia cheng mi 180,000 vel chu an tlanchhe tawh a, mahse an zinga 22,000 vel chu an chenna lamah hian an kir leh tawh niin a sawi. Thuneitute chuan Kahsir leh Hasansham camp-a chengte an kir leh theihna tur hian kar khatah ṭum hnih ruahmanna a siam a ni.

Nilaini khan chhungkaw 500 chu an in lamah hruaikir leh an nih thu local official Mustafa Hamid Sarhan chuan a sawi a, khawpui lama kir turte hruaina atan hian bus 50 hman a nih thu a sawi bawk. Hetih­lai hian khawpui chhunga inbeihna avang hian mipuite khawsak a la harsa hle a, electric leh tui supply a la mumal lo a, khawsakna atana mamawhte pawh a la harsa hle a ni.